لە دهۆک کرێکارێکی تەمەن ٢٣ ساڵ بەهۆی کەوتنی کرێنێکەوە گیانی لەدەستدا
دهۆک – دەنگی کرێکار
دواینیوەڕۆی دوێنێ ٢٠٢٦/٧/١٩لە ڕووداوێکی دڵتەزێندا لە شاری دهۆک، کرێکارێکی گەنج لە کاتی ئەنجامدانی کارەکەیدا لە پڕۆژەیەکی نیشتەجێبووندا گیانی لەدەستدا، ئەمەش جارێکی تر پرسی نەبوونی مەرجەکانی سەلامەتیی پیشەیی لە پڕۆژەکانی بیناسازیدا دەهێنێتەوە بەرباس بڵاوبوونەوەی هەواڵەکە ئاماژە بەوە دەکەن کە کرێکارەکە ناوی (زیرەک زۆرچاک) و تەمەنی ٢٣ ساڵە. ڕووداوەکە لە پڕۆژەیەکی نیشتەجێبوون لە گەڕەکی کیڤڵای شاری دهۆک ڕوویداوە، کاتێک لە کاتی کارکردندا کرێنێک (ئامێری بەرزکەرەوە) بەسەریدا کەوتووە و بە سەختی بریندار بووە. دوای ڕووداوەکە، گەنجەکە بە خێرایی ڕەوانەی نەخۆشخانە کراوە، بەڵام بەهۆی سەختیی برینەکەی و تووشبوونی بە خوێنبەربوونی مێشک، نەتوانرا ژیانی ڕزگار بکرێت و گیانی لەدەستدا. دواتر تەرمەکەی بە مەبەستی توێکاری گوازرایەوە بۆ بەڕێوبەرایەتیی پزیشکی دادی دهۆک. ئەم ڕووداوە لە کاتێکدایە کە ساڵانە ژمارەیەکی زۆر لە کرێکاران لە هەرێمی کوردستان، بەهۆی نەبوونی توندوتۆڵی لە جێبەجێکردنی ڕێنماییەکانی سەلامەتی و پاراستنی پیشەیی لەلایەن کۆمپانیا و خاوەن پڕۆژەکانەوە، دەبنە قوربانی و گیانیان لەدەستدەدەن یان کەمئەندام دەبن. پەپێی ئاماری دەنگی کرێکار لەسەرتای ئەمساڵەوە بەم ڕوداوە بووە ٤١حاڵەتی گیان لەدەستدانی کرێکار بەڕوداوی شوێنی کار
