ڕووداوێکی تری کار لە هەولێر کارمەندێکی کارەبا لە کاتی ڕاپەڕاندنی ئەرکەکەیدا گیانی لەدەستدا
دەنگی کرێکار / هەولێر
بهداخهوه زنجیرەی قوربانیانی کرێکاران و فەرمانبەران لە کاتی کارکردندا بەردەوامە و هێشتا مەرجەکانی سەلامەتیی پیشەیی لە ئاستی پێویستدا نین. ئەمڕۆ سێشەممە، ٩ی حوزەیرانی ٢٠٢٦، کارمەندێکی تەکنیکیی بەڕێوەبەرایەتیی کارەبای هەولێر، لە کاتی ڕاپەڕاندنی ئەرکێکی فەرمیدا، بەهۆی تەزووی کارەباوە ڕاستەوخۆ گیانی لەدەستدا. بەپێی ئەو زانیارییانەی تایبەت بە سایتی (دەنگی کرێکار) گەیشتوون، قوربانییەکە ناوی شاخەوان مرشیدە و کارمەندی بەڕێوەبەرایەتیی کارەبای هەولێر بووە.
ڕووداوەکە لە کاتێکدا بووە کە ناوبراو لەسەر شەقامی ١٠٠ مەتریی شاری هەولێر سەرقاڵی چاککردنەوە و ڕێکخستنی تۆڕەکانی کارەبا بووە، بەڵام بەهۆی بەرکەوتنی تەزووی بەهێزی کارەبا، دەستبەجێ لە شوێنی ڕووداوەکەدا گیانی سپاردووە.
