ڕانیە: لەنەورۆزدا، مامۆستایان و کارمەندان، لەدژی نەدانی موچە گردبونەوەیەکی ناڕەزایەتیان بەڕێخست!
ڕۆژی ٢٠٢٤/٣/٢١، واتە لەنەوڕۆز ویەکەم ڕۆژی بەهاردا، کارمەندان ومامۆستایان لەجیاتی خۆشی و ئاهەنگەکانیان، لەبەردەم باخی گشتی ڕانیەدا گردبونەوەیەکی ناڕەزایەتیان لەدژی خۆدزینەوەی حکومەت لەپێنەدانی مووچەکانیان ئەنجامدا. گردبونەوە ناڕەزایەتیەکە لەڕێگای بەیان نامەیەکەوە دووپاتیان کردەوە کەبەردەوام لەشەقامدا ئەبن لەپێناوی مافەکانیان و داوایانکرد کەسەرتاپای خەڵکی کوردستان بەخۆپیشاندانەکانی مامۆستایان وکارمەندانەوە پەیوەست بن بۆ تووندوتۆڵکردنەوەی فشارەکانیان.
لەبەیان نامەکەیاندا هاتووە: ”ئەوەی کەحکومەت و دەسەڵاتداران ئەیکات گرفت نەبوونی پارەو بودجە نیە، بەڵکو سیاسەتی ئابوری سەرمایەداری و بەبەرنامە بۆ داڕێژراوە کەمووچە لەنێوان هەردوو حکومەتی ناوەندو هەرێمدا بەبارەمتە گیراوە. ئەوەی کەحکومەتی هەرێم دەیکات تەنها ڕشتنی ڕق و کینەیە بەرامبەر بە میللەتێکی چەوساوەی ژێر دەسەڵاتێکی ناعەدالەت“.
لەلایەکی دیکەشەوە مامۆستایان و مووچەخۆرانی گەرمیان، یەکێتی وپارتی و گۆڕان بەبەرپرسیار دەزانن بەرامبەر بەو هەموو ئەو ستەم وزوڵمەی کە دەرهەق بەکارمەندان و مامۆستایان وهاوڵاتیانی کەمدەرامەتی کوردستانی دەکەن وماوەی ٦ مانگە تەنها مووچەیەکیان پێدراوەو دەڵێن: ئەو سێ حزبە ڕاستەوخۆ بەرپرسیارن لەو هەموو نەهامەتیەی کەبەسەر خەڵکی کوردستاندا هێنراوە.
