چیتر لەبەرامبەر خواست و مافە ڕەواکانماندا بێدەنگ نابین!
پەیامێک لەئەنجومەنی سەربەخۆی کرێکاران وکارمەندانی بەڕیوەبەرایەتی کارەبای سلێمانیەوە بۆ ڕای گشتی
| دەنگی کرێکار:
وەک ناڕەزایەتیەک بەرامبەر بەنەدان و دواکەوتنی موچەکانیان، ئەنجومەنی سەربەخۆی کرێکاران و کارمەندانی بەڕێوەبەرایەتی کارەبای سلێمانی، لەکۆنگرەیەکی ڕۆژنامەوانیدا لەباخی گشتی سلێمانی، ڕاگەیاندنێکی لەژێر ناوی”بۆ ڕای گشتی و زەنگێک بۆ دەسەڵات” بڵاوکردەوە، کە تێیدا ئاماژە بەدۆخی ناهەمواری ژیان و گوزەرانی کرێکاران و کارمەندان، بەهۆی نەدانی موچەکانیانەوە دەکات. لەڕاگەیاندنەکەدا وێڕای ئەوەی حکومەت ئاگادار دەکەنەوە، هاوکات چەند خواستێکیشیان خستۆتەڕوو، کەئەمانەن:
١/ پێوسیتە دەستبەجێ مووچەی مانگی دەمان(١٠) پێبدەن و لەمەودواش هەموو مانگێک لەکاتی خۆیدا مووچەکانمان پێبدرێت
٢/ وەک تەواوی مووچەخۆرانی عێراق مووچەکانمان توطین بکرێت لەدەرەوەی هەژماری من. هەروەها تەواوی دەرماڵەکانمان هاوشێوەی دەرماڵەی فەرمانبەرانی عێراق بکرێت.
٣/ دەستبەجێ دەستبکرێتەوە بەپلەبەرزکردنەوەی فەرمانبەران کەساڵانێکی دوورو درێژە بەناڕەوا ڕاگیراوە.
٤/ گەڕاندنەوەی مووچە پاشەکەوتکراوەکانمان کەمافێکی سەرەتایی خۆمانە کەبەناوی ئابوری سەربەخۆوە لێمانبڕاوە.
٥/ گەڕاندنەوەی سێ مووچەی پارساڵمان(١٠-١١-١٢) کەلێمانبڕاوەو کەوتۆتە نێوان گیروگازی حکومەتی ناوەندو هەرێمەوە.
٦/ ڕایدەگەیەنین ئەگەر لەماوەیەکی دیاریکراودا وەڵام بەخواستەکانمان نەدەنەوە، ئەوا هەموو ڕێگایەکی مەدەنیانە دەگرینەبەر.
