ئاوات عەلی/نوێنەری دەنگی کرێکار- سویسرا :
ڕۆژی ١٦ ی سێپتامبر و لەشاری بیرنی پایتەختی سویسرا، لەسەر بانگەوازی یەکێتی سەندیکاکانی سویسرا ، ٢٠ هەزار لە کرێکاران و خەڵکی سویسری، دژ بەگرانی سەرسوڕهێنەری ژیانیان کە وەکو خۆیان باسی لێوە دەکەن بێوێنەیە بەڕیکەوت. ئەم خۆپیشاندانە جەماوەریە بەدوای بڕیارێکی حکومەت و کۆمپانیاکاندا دێت، کەنرخی کاڵا پێویستیەکانی ڕۆژانەی هاوڵاتیان، بەڕیژەیەکی زۆر زیادی کردوە، لەوانە: کرێ خانوو ٨٪، تەئمینی تەندروستی ١٣٪، ئاوی گەرم و سیستەمی گەرم کردنی ماڵان لە زستاندا٥٥٪، هاتوو چۆ ٤٪، خواردەمەنی٦٪، کارەبا ٤٦٪..
بۆ ڕوبەڕوبوونەوەی ئەم ژیانە کارەساتبارە کە سەرمایەداران و دەوڵەت بڕیارانداوە دایسەپێنن بەسەر خەڵکدا سەندیکا کرێکاریەکان داوای زیادکردنی مووچە دەکەن بەڕێژەی ٥٪ و قانوونی کردنی سێزدەهەمین موچەی خانەنشینان. جێگای ئاماژەیە خۆپیشاندەران، لەهەموو شارەکانی سویسراوە و بە وتارکێشان بەرەو پایتەخت بەرێ کەوتن وبەهەڵبڕینی هەزاران پلاکارتو لافیتە کە خواستەکانی جەماوەری ناڕازی لەسەر نوسرابوو، لەوانەش: “زیادکردنی موچەو دانانی زەریبە لەسەر سەرمایەداران، لە خەزێنەی دەوڵەت و سەرمایەداران پارەیەکی زۆر هەیە پێویستە موچە زیاد بکرێت”، “ئیتر بەسە ژیانی کولەمەرگی”، “زیادکردنی موچە بەڕیژەی ٥٪”، “ئەوەی موچە کەم دەکاتەوە ڕق و تووڕەیی خەڵکی بەرەوڕوو دەبێتەوە”، “ئەوە ئێمەین سەروەت و سامانی کۆمەڵ بەرهەم دەهێنین، بەڵام خۆمان لێی بەهرەمەندە نین”. شایانی باسە لەم خۆپیشاندانەدا سەرۆکی یەکێتی سەندیکا کرێکارییەکانی سویسرا کە ئەندامی حیزبی سۆسیالیستی سویسرایە لەگەل چەندەها کەسانی تر بەزمانەکانی ئەڵمانی و فەڕەنسی و ئیتالی قسەیان بۆ خەڵک کرد.
