هەولێر؛ دوو کرێکار لەناو تەنکییەکی قیردا گیانیان لەدەستدا
دەنگی کرێکار – هەولێر لە ڕووداوێکی دڵتەزێندا لە یەکێک لە کارگەکانی دروستکردنی “ئیزوگام” لە شاری هەولێر،
دوو کرێکار لە کاتی ڕاپەڕاندنی ئەرکەکانیاندا کەوتنە ناو تەنکییەکی قیر و بەهۆی نەمانی ئۆکسجینەوە خنکان.
وردەکاری ڕووداوەکە بەپێی زانیارییە سەرەتاییەکان، ڕووداوەکە لە کاتی پاککردنەوەی تەنکییەکی قیردا ڕوویداوە.
ئەو دوو کرێکارە لە کاتی چوونە ناو تەنکییەکە، تووشی کەمیی ئۆکسجین بوون و نەیانتوانیوە خۆیان ڕزگار بکەن، لە ئەنجامدا هەر لەوێدا گیانیان لەدەستداوە.
ناسنامەی قوربانییەکان سەبارەت بە ناسنامەی کرێکارەکان، سەرچاوەکان ئاماژە بەوە دەکەن کە: یەکێکیان کرێکارێکی بەڕەگەز ئێرانییە. ئەوی تریان هاووڵاتییەکی وڵاتی بەنگلادیشە. هەوڵەکانی فریاگوزاری بەرگری شارستانی هەولێر ڕایگەیاندووە کە تیمەکانیان دەستبەجێ گەیشتوونەتە شوێنی ڕووداوەکە. تا ئێستا تیمەکان لە هەوڵێکی بەردەوامدان بۆ دەرهێنانی تەرمی ئەو دوو کرێکارە لەناو تەنکییەکەدا، بەڵام بەهۆی سروشتی ماددەی قیرەکەوە پڕۆسەی دەرهێنانیان کاتی پێدەچێت. ئەم ڕووداوە جارێکی تر پرسی کەمیی مەرجەکانی سەلامەتی و پاراستنی ژیانی کرێکاران لە کارگەکاندا دەهێنێتەوە بەرباس، کە ساڵانە دەبێتە هۆی گیانلەدەستدانی ژمارەیەک کرێکاری ناوخۆیی و بیانی.
