بایکۆت لەزۆنی سەوزدا دەستی پێکردو خەریکە سەراسەری ئەبێتەوە!
دەنگی کرێکار
لەشارى سلێمانى ماوەی دوو هەفتەیە بایکۆتى بەڕێوەبەرایەتى هاتوچۆى سلێمانى بەردەوامەو جگە لەویش چەندین فەرمانگە و بەڕێوەبەرایەتی دیکە بایکۆتى دەوامیان کردووە.
ئەمڕۆ بەڕێوەبەرایەتی چاودێرى کۆمەڵایەتی، بەڕێوەبەرایەتى کارەباى گشتی سلێمانى، بەڕێوەبەرایەتی دابەشکردنی کارەبای سلێمانی هەردوو بەشەکەی( ڕۆژهەڵات و ڕۆژئاوا)، شارەوانی ڕۆژهەڵاتی سلێمانی بەڕێوەبەرایەتی کارەبای ڕانیە، دادگاى سلێمانى، فەرمانگەکانى دادنوس، بەڕێوەبەرایەتی ڕێگاوبان، بەرایەتیەکانی سنوری ڕاپەڕین، بەشێکی زۆری بنکە تەندروستیەکان و سەرجەم فەرمانگەو بەڕێوەبەرایەتیەکانى باج و دەرامەت بایکۆتیان لەکارەکانیان ڕاگەیاند. ئەم بایکۆتە گشتی و سەراسەرییە کەبەهۆی پێنەدانی مووچەوەیەو٥٣ ڕۆژ تێئەپەڕێنێت.
سەبارەت بەناوەندەکانی خوێندنیش، ٢٤-٣-٢٠٢٤ زانکۆى سلێمانیش بایکۆتى ڕاگەیاندو بەشێکى زۆریش لەناوەندەکانى خوێندنى سنورى شارى سلێمانى خوێندنیان ڕاگرتووە، هاوکات لەسنورى پارێزگاى هەڵەبجەش زانکۆى هەڵەبجە بایکۆتى ڕاگەیاندوەو بڕیارە سبەینێ خۆپیشاندانى بەرفراوانى مامۆستایان و فەرمانبەران لەشەقامی بازنەیی مەلیک مەحمود دەستپێبکات و داوا دەکەن کە مووچەکانیان دابەش بکرێت و لیستى فەرمانبەرانى هەرێمیش بنێردرێت بۆ بەغداد. هەر ئەمڕۆش ٢٤-٣-٢٠٢٤ دەستەی دەرچوانی دانەمەزراوی بەشە کشتوکاڵییەکان بڕیارە گردبوونەوەو کۆنگرەیەکی ڕٶژنامەوانی ببەستن.
