نامەی هاوپشتی بڵاو کراوەی دەنگی کرێکار بۆ کرێکارانی ژینگە پارێزی ئیدارەی راپەرین!
ئەمڕۆ ١٦ ی دیسامبەری ٢٠٢٣ ، جارێکی تر ژینگەپارێزانی دەڤەری پشدەرو ڕانیە دەستیان دایەوە مانگرتن لەپێناوی وەرگرتنی مووچەکانیان کە ٩٥ ڕۆژە دەستی دەستیان پێ ئەکرێت لەلایەن کۆمپانیاکانەوە. ئەم مانگرتنەی کرێکاران، ژینگەپارێزانی چەمچەماڵیشی گرتەوەو لەڕێگای گردبوونەوەیەکەوە نمایشی خۆیان پیشاندا لەسەر مووچەکانیان.
ئێمە لەبڵاوکراوەی دەنگی کرێکارەوە، سەرەڕای دووپاتکردنەوەی هاوپشتی خۆمان بۆ داوا ڕەواکانی ژینگەپارێزان، هاوکات ئەم سیاسەتی برسی کردن و خۆدزینەوەیەی کۆمپانیاکان لەپێنەدانی مووچەی کرێکاران ئیدانەو شەرمەزار ئەکەین و ڕاستەوخۆ حکومەت و کۆمپانیاکان لێپرسراو ئەکەین بەرامبەر بەم زوڵمەی کەلەکرێکاران ئەکرێت. لێرەشەوە داوا لەفەرمانبەران و خەڵکی وەتەنگ هاتووی کوردستان ئەکەین بۆدیفاع لەکرێکاران و ماف و خواستەکانیان پشتیوانی بکەن و بەهەر ڕێگایەک بۆیان دەکرێت لەڕێگای فشارەکانی خۆیانەوە حکومەت و کۆمپانیاکانی ناچار بکەن کە مافی زەوتکراوی کرێکاران بگێڕنەوە.
